Heimilið komið í snjallsímann
Heimilið komið í snjallsímann

5 leiðir til að halda heimilinu öruggu á meðan þú ferð í fríið

 

Með snjalltækni ert þú aldrei langt frá heimili þínu, þó svo að þú sért hinum megin á hnettinum. Þú þarft bara að kíkja í snjallsímann til þess að fylgjast með og stjórna ýmsum gagnlegum hlutum á heimilinu. Þannig gætir þú til dæmis notað snjalllás til að hleypa vinsamlega nágrannanum inn til að vökva blómin á meðan þú sleikir sólina á ströndinni á fjarlægum slóðum. Þú getur svo á einfaldan hátt sannreynt að hann hafi ekki gleymt að vökva uppáhalds jukkuna þína.

Hér eru fimm atriði sem tryggja það að þú getir spókað þig í sólinni og notið drykkjar við ströndina í friði, vitandi það að eigur þínar eru í öruggum höndum – þú hefur yfirsýnina og viðbragðsaðili er tiltækur að bregðast við boðum.

 

1. Gættu þess að húsið sé læst, gluggar lokaðir og öryggiskerfið á verði

Hver kannast ekki við tilfinninguna þegar maður reynir að rifja upp hvort öllu hafi verið vandlega læst og lokað og öryggiskerfið sett á vörð? Með nútímalegum og snjöllum öryggiskerfum getur kannað snjalllásana þína í gegnum símann, sem staðfestir í hvaða stöðu þeir eru. Þú getur séð stöðu á öllum rofum sem eru á hurðum og gluggum og þannig séð hvort það sé ekki örugglega allt læst og lokað. Með myndavél í hreyfiskynjara getur þú „skotist heim“ og fengið lifandi myndir til að sannreyna að allt sé með frið og spekt. Svo sérðu auðvitað í símanum hvort öryggiskerfið sé ekki örugglega á verði.

 

2. Veittu aðgang að vild

Með einföldum snjalllæsingum getur þú opnað og læst hurðum. Þú gætir óvænt þurft að veita einhverjum aðgang að húsinu þínu á meðan þú ert í burtu eða kannski vill tengdamamma komast inn til að sækja pottana sem hún lánaði þér fyrir löngu síðan. Hún erfir það greinilega við þig að þú hafir ekki boðið henni með á ströndina. Á einfaldan hátt í appinu getur þú veitt þeim aðilum sem þú treystir aðgang og fengið upplýsingar um hvernig þeir nota aðganginn. Óþarfi er að skilja lykla eftir undir dyramottunni og gera líf innbrotsþjófa auðveldara. Þú getur einnig veitt gestum tímabundinn aðgang.

 

3. Hermt eftir þinni heimaveru

Með snjallreglum getur þú látið líta út eins og einhver sé heima. Þú getur stillt upp mynstri t.d. að ljós kvikni á ákveðnum tíma, sjónvarp eða útvarp fari af stað, Þannig að það líti út eins og einhver sé í húsinu. Slík tækni í bland við öfluga samvinnu nágranna í innbrotavörnum getur aukið verulega á öryggi heimilisins. Auðvitað þarf áfram að huga vel að því að verja heimili sem best fyrir mögulegum innbrotum, hafðu góða lýsingu í kringum húsið, ekki skilja eftir áhöld utandyra sem þjófar geta beinlýnis nýtt sér við innbrot, fáðu nágranna til að leggja bíl í stæðið hjá þér og passaðu að póstur safnist ekki upp. Allt þetta eru gömul og gild ráð til að lágmarka hættu á innbroti.

  

4. Fylgstu með í rauntíma

Margt getur komið fyrir í mannlausu húsi. Stærsti tjónaliður á heimilum eru vatnstjón. Mikilvægt að fá strax boð um atvik sem geta leitt til stærri vandamála, til dæmis vatnsleki í eldhúsi þar sem ekkert niðurfall er til að taka við slíkum leka. Vatnskynjarar og jafnvel reykskynjarar, ef um heitt vatn er að ræða, hjálpa þér að fylgjast með þessu. Það sama gildir ef einhver reynir að brjótast inn. Sama hvert neyðartilfellið er, tilkynning í rauntíma til stjórnstöðvar tryggir viðbragð og þú hefur fullkomna yfirsýn um atvik í appinu. Vissulega getur það gerst að þjófar brjótist inn á heimili sem eru með öryggiskerfi tengt stjórnstöð. Það er þó afar fátítt og öryggiskerfið tryggir viðbragð á mjög skömmum tíma. Þjófar hafa því aldrei tækifæri til þess að hreiðra um sig og valda miklum spjöllum.

 

5. Hreindýrið í frystinum og kötturinn í gluggakistunni

Ekki gleyma þeim sem komust ekki með í fríið. Kötturinn malar í gluggakistunni á meðan þú ert upp í bústað. Þú kíkir í mydnavélina til að fullvissa þig um að allt sé í góðu og hann sé ekki að klifra upp á mósaík styttuna sem þú ert búin að vera fimm ár að venja hann af. Snjallkerfi láta þig vita ef rafmagn fer af húsinu. Margar fjölskyldur hafa lent í því leiðinlega tjóni að rafmagn hefur farið af frystkistum og allt eyðilagst. Fari rafmagnið af húsinu hjá þér getur þú treyst á að kerfið sendi viðvörun og hreindýrið fagra sem þú skaust síðasta haust haldist í mínus 18 gráðum.

 

Fyrir ekki svo löngu síðan voru snjallheimili talin til vísindaskáldskapar. Staðreyndin er sú að við erum komin þangað og það hefur aldrei verið einfaldara, aðgengilegra og ódýrara að auka öryggi heimilisins og gera það ansi snjallt á sama tíma.